講都唔信, 我居然同小虎堅持到行山1個多月了….準時7am開始…平日行1小時, weekend就會2小時…..雖不是天天去…但每星期總會去4-5次.

 

肌肉結實了不少…雖然在生日月食得好甘…但都冇點肥….脂肪%亦回復正常水平 (之前一向都有超標的)….皮膚同精神都好咗好多….眼見咁多好處, 所以我兩辛苦點, 都會晨早爬起身…造完晨運先返工.

 

開頭真的又腳痛, 又疲倦….好多時在weekend, 行完回來, 冲完涼, 第2件事就是上床瞓番幾粒鐘……..所以當我在父皇面前, 吹噓自己幾咁堅持+行咗好多路…自封為女鐵人時….父皇都會加以冷笑: 鐵就鐵…但生銹嗰隻.

 

行山的都是老人家多, 但每位都比我們精壯….我們行到面青口唇白…人家仍能好好中氣哋傾偈, 什至jam歌.

 

我哋著晒外套 (風好大)…他們仍是一件t-shirt…什至可以在山澗抹身….非常香艷.

 

漸漸開始習慣, 亦會有心情留意一吓身邊的人.環境.是多麼有趣…..原來就在我家的石屎森林不遠, 真的有個咁靚的交野公園.

 

 

 

 

 

 

現在是白茶花盛開嘅季節…好靚架.

 

 

初初, 我是聽住mp3嚟行…外界嘅聲音, 我唔多聽得到…有天小虎同我講咗一件事…自始, 我再不會行山聽mp3了.

 

嗰天小虎冇去…我自己去….晚上佢打比我

小虎: 你知唔知你响山嚮朵了?

Tata: 冇可能, 我造咗啲乜?

小虎: 我阿爸阿媽今朝行山時見到你

Tata: …我冇見到auntie . uncle喎

小虎: 這就是重點了….我阿爸在你後面, 見到你, 就叫你….但你應係聽mp3, 所以聽唔到. 你又行得快….佢係咁追你…一路大叫ANITA….阿媽話佢越叫越大聲….而家應該成山人都知你叫ANITA…

 

但冇咗MP3…我就會聽吓啲行山人士嘅對話….往往笑到我死:

 

A太: 陳太嗰仔讀書好叻架

B太: 唔覺喎

A太: 佢中5嗰時係狀元嚟架

B太: 車 ~ 佢死讀書唶…咧啲人嘅成績維持唔到嘅.

A太: 但佢讀名校架

B太: 好叻咩…名校比錢就入到

A太: 但係佢入咗大學喎

B太: 咁咪係囉….佢咁叻, 就唔會考唔到香港嘅大學…要走到英國, 讀嗰間嘢叫劍橋啦!!!

A太: 咁你又講得啱喎.

 

我哋行行吓, 見到啲樹生咗兩隻橙…覺得好明顯係個天獎比我哋解渴的 ~ 一人一個….但我哋愛護大自然, 所以冇去摘 (其實係太遠摘唔到)…….但幾日後, 小虎在本介紹香港行山路線嘅書有介紹咧隻果 ~ 叫馬錢子…係香港4大毒果! 好彩冇摘嚟食.

 

 

 

這兩天…我哋覺得自己叻咗..就挑戰其他的路線….結果就迷路了 (都唔算係100%迷路…只係唔知出口仲有幾遠)…越行越少人…越行越陰森….兩件路痴又唔識睇地圖 ~ ~ 好在…憑住我哋堅強嘅意志…都行到返去 “文明”.

 

我哋嘅意志…就係茶餐廳的早晨特餐….一諗到有杯好味的奶茶…就會開行TUBO往前行.